ye ziist ranj men guzre ki shadman guzre
tire baghair jo guzre to ra.egan guzre
ba-qaid-e-hosh jo guzre ba-qaid-e-jan guzre
vo kya maqam-e-mohabbat se kamran guzre
nazar ko apni basarat bhi jab giran guzre
ḳhuda kare na phir ankhon se vo saman guzre
dayar-e-shauq se jab bahr-e-imtihan guzre
ham apni jaan se guzre to kamran guzre
qadam qadam pe ḳhirad sadd-e-rah thi lekin
junun-e-shauq salamat ravan-davan guzre
ye mai-kada vo jagah hai jahan se ai saaqi
nazar chura.e hue gardish-e-jahan guzre
chaman-parast huun mujh ko chaman se ulfat hai
bala se us men bahar aa.e ya ḳhizan guzre
tira karam hai jo saya-fagan to kya gham hai
hazar baar mire sar se asman guzre
kisi ka faiz ‘mubarak’ nahin to phir kya hai
ki ham jahan se bhi guzre hain kamran guzre
Leave a Reply