band honTon se bhi iz.har-e-tamanna karte
aaina ban ke tire husn ko dekha karte
apna saaya bhi yahan ghair nazar aata hai
ajnabi shahr men ham kis pe bharosa karte
us ki mahfil men to ik bhiiḌ thi divanon ki
pahle dil ahl-e-nazar ahl-e-vafa kya karte
ishq har haal men paband-e-vafa hota hai
ham to badnam the kyuun aap ko rusva karte
itni guzri hai jahan aur guzar jaegi
zindagi ke liye itna nahin socha karte
jab talak saans chale bas yuun hi chalte rahiye
chal ke do-char qadam yuun nahin Thahra karte
ai ḳhuda ham tiri vahdat pe yaqin rakhte hain
kyuun tire dar ke siva ham kahin sajda karte