Shahnaz Parveen Shazi
use kya farq padta hai
december biit jaane se
yakum tarikh aane se
kisi bhi sal-e-nau ke khair-maqdam par khushi ke shadyane se
surur-o-kaif-o-masti men mohabbat ke tarane se
club aur hotalon men vahshiyana raqs par saudaiyon ke thartharane se
use kya farq padta hai
use to har guzarta saal ik jaisa hi lagta hai
vo ik mazdur he jis ki
musalsal bhuuk aur iflas se arse se lambi jang jaari hai
ki jis ke samne har subh pai-dar-pai mashaqqat ke taqaze hain
kadi mehnat riyazat jehd-e-paiham us ka maslak hai
use kya farq padta hai
calender par nae hindson ki ik tarikh aane se
december biit jaane se
naya ik saal aane se
Leave a Reply