be-karan samjha tha ḳhud ko kaise na-danon men tha
asman bikhra to har-su shabnami danon men tha
main ne jis ziine pe rakkha pa to mujh ko Das gaya
jab bhi daana main ne phenka saanp ke ḳhanon men tha
phir koi mauj-e-bala kaise mira sar le ga.i
ai ḳhuda mere ḳhuda tu bhi nigahbanon men tha
ik lahu ki buund thi lekin ka.i a.ankhon men thi
ek harf-e-mo’tabar tha aur ka.i ma.anon men tha
sochte hain kis tarah is shahr men jiite rahe
astin men saanp the aur zahr paimanon men tha
jaane kaisi thi ‘mujibi’ aag us ke lams ki
jism ka sona pighal kar sab miri ranon men tha
Leave a Reply