Pesh-Tar Jumbish-E-Lab Baat Se Pahle Kya Tha

Ejaz Gul

pesh-tar jumbish-e-lab baat se pahle kya tha

zehn men sifr ki auqat se pahle kya tha

vaslat o hijrat-e-ushshaq men kya tha avval

nafi thi ba.ad to isbat se pahle kya tha

koi gardish thi ki sakit the zamin o ḳhurshid

gumbad-e-vaqt men din raat se pahle kya tha

main agar pahla tamasha tha tamasha-gah men

mashghala us ka miri zaat se pahle kya tha

kuchh vasila to raha hoga shikam-seri ka

rizq-e-ḳhufta ki nabatat se pahle kya tha

main agar adam-e-sani huun to virsa hai kahan

zarf-e-ajdad men amvat se pahle kya tha

har mulaqat ka anjam juda.i tha agar

phir ye hangama mulaqat se pahle kya tha

main bhi maghlub tha hajat ki kasrat se magar

lutf us ko bhi munajat se pahle kya tha