Surur-O-Raqs-O-Masti, Main Nahin Hun

surūr-o-raqs-o-mastī, maiñ nahīñ huuñ

mukammal ghar-girhastī maiñ nahīñ huuñ

vahī sadiyoñ purānī, aam aurat

anokhā rāz-e-hastī, maiñ nahīñ huuñ

hai dil kī aarzū sahrā-navardī

shahar, qasba yā bastī, maiñ nahīñ huuñ

kahīñ ik khet merā muntazir hai

so dariyā par barastī maiñ nahīñ huuñ

mire in qahqahoñ kā raaz samjho

basā-auqāt hañstī maiñ nahīñ huuñ

Leave a Comment