mohabbaton ka chaman pa.emal ham ne kiya
ḳhud apne aap ka jiina muhal ham ne kiya
jo lazzaten hain dukhon men masarraton men kahan
mila uruuj to us ko zaval ham ne kiya
na kar-e-dil ke the laa.eq na kar-e-duniya ke
jo kuchh kiya to gham-e-mah-o-sal ham ne kiya
hazar dard ke mausam guzar ga.e lekin
kabhi daraz na dast-e-saval ham ne kiya
ye ramz-e-ishq ye nazuk kina.e ham ne sikha.e
nigah-e-naz tujhe be-misal ham ne kiya
diye tarash liye yaas ke andheron se
gham-e-firaq ko ḳhvab-e-visal ham ne kiya
suḳhan se rang gaya zindagi se ḳhvab ga.e
ye zaḳhm hijr ka kyuun indimal ham ne kiya
hui hai aaj tabi.at suḳhan pe phir maa.il
so mauj-e-dard ko dil men bahal ham ne kiya
Leave a Reply