Nazar Nazar Ko Saqi-E-Hayat Kahte Aae Hain

Nushur Wahidi

nazar nazar ko saqi-e-hayat kahte aa.e hain

un ankhḌiyon ko mai-kade ki raat kahte aa.e hain

ba-chashni-e-ahd-e-nau jo baat kahte aa.e hain

gham-e-jahan ko dil ki ka.enat kahte aa.e hain

fareb-e-shauq ko taḳhaiyyulat kahte aa.e hain

bikhar ga.e to gesuon ko raat kahte aa.e hain

usi ko zindagi ka saaz de ke mutma.in huun main

vo husn jis ko husn-e-be-sabat kahte aa.e hain

ye muḳhlisan-e-ishq bhi ajab ada-parast hain

vo muskura diye to iltifat kahte aa.e hain

hayat ta-mamat ek silsila hai ishq ka

kahan hain vo jo marg ko najat kahte aa.e hain

na zahidon ke va.az-e-tark-e-ishq par hanse koi

ye be-ḳhabar bhi hausle ki baat kahte aa.e hain

ye zarf-e-bada kya hai bada-ashna se puchhiye

ham is ko shisha-e-tajalliyat kahte aa.e hain

ghazal hai naam husn ke muamalat-e-ḳham ka

ḳhata hui ki dilbaron ki baat kahte aa.e hain

sukun o ḳhvab zindagi ki raah men kahan ‘nushur’

hayat ko musafirat ki raat kahte aa.e hain