teri ye zulfen nahin tere ruḳh-e-raushan ke paas
abr ke do TukḌe uTh kar aa.e hain gulshan ke paas
kyuun zamin hilne lagi hai kyuun pareshan ruuh hai
kaun ghabra ke chala aaya mire madfan ke paas
khinchna jazb-e-mohabbat us ka daman dekh kar
sar-nigun baiTha na ho fitna koi daman ke paas
phir to DhunDa bhi nahin milta koi murgh-e-chaman
ghar agar sayyad ka hota kisi gulshan ke paas
kaun deta hai hamare dil ko ye targhib-e-nek
rahnuma baiTha hua hai kya koi rahzan ke paas
main to samjha tha ki ab chhuTa gham-o-alam se
tegh us ki ruk ga.i aa kar miri gardan ke paas
bazm-e-dushman men naya fitna koi uThne ko tha
ḳhair guzri aap aa baiThe qayamat ban ke paas
‘shad’ ab dil ka tumhare haath aana hai muhal
vo magan baiTha hua hoga kisi pur-fan ke paas
Leave a Reply