Hayat Madrasi
abhi hayat ka mahaul sazgar kahan
bhala huzur kahan aur ye ḳhaksar kahan
bas ek rasm-e-mulaqat aaj baaqi hai
kisi ke dil men kisi ke liye bhi pyaar kahan
ḳhayal-e-yar hai vaj.h-e-sukun-e-dil lekin
ḳhayal-e-yar kahan jalva-gah-e-yar kahan
suna hai yuun to chaman men bahar aa.i hai
gulon ke ruḳh pe magar raunaq-e-bahar kahan
tumhin ne ḳhair se muḳhtar-e-kul banaya hai
tumhin batao ki ham ko hai iḳhtiyar kahan
nigah-e-mast se tu ne kabhi jo dekha tha
vo lamhe ziist men milte hain baar baar kahan
na ku-e-yar chale hain na su-e-dar ‘hayat’
na jaane ham bhi chale hain pas-e-ghubar kahan
Leave a Reply