Muztar Khairabadi
aish ke rang malalon se dabe jaate hain
ab to ham apne hi halon se dabe jaate hain
paanv rakhna mujhe sahra men bhi dushvar hai ab
saare kanTe mire chhalon se dabe jaate hain
tauba tauba vo mire ḳhvab men kya a.enge
jagte men jo ḳhayalon se dabe jaate hain
allah allah ri nazakat tire ruḳhsaron ki
itne nazuk hain ki khalon se dabe jaate hain
tu hai koThe pe to katra ke nikalti hai ghaTa
kaale badal tire balon se dabe jaate hain
kya daba.enge ubhar kar tire joban zalim
ye to ḳhud dekhne valon se dabe jaate hain
un ko ai shauq-e-talab chheḌ ke mahjub na kar
jo mohabbat ke ḳhayalon se dabe jaate hain
be-tarah bar-e-mohabbat to paḌa hai un par
aap kyuun chahne valon se dabe jaate hain
baar huun dida-e-arbab-e-suḳhan par ‘muztar’
mudda.i mere kamalon se dabe jaate hain
Leave a Reply