Poet
tire bana.e ko bar-e-digar banate hue
main thak gaya huun darichon ko dar banate hue
tujhe ḳhabar nahin guzre kis imtihan se ham
tiri shabih tujhe dekh kar banate hue
pas-e-hayat dikhate ho ik na.i duniya
lagegi der idhar ko udhar banate hue
kabhi zamin pe kitni zamin hoti thi
vo sochta hai samundar men ghar banate hue
ai dar-e-ḳham zara dekh kaisi pathra.i
miri nigah tujhe beshtar banate hue
zamin chiir ga.i asman pe haavi hui
ye meri aankh nazar ko nazar banate hue
mukalme men zaban laḌkhaḌane lagti hai
pa-e-darogh agar ko magar banate hue
ḳhuda ke but pe ye qasdan nahin mira chehra
bahak gaya tha zara haath sar banate hue
vo naqsh-gar tha parindon ka aur phir ik din
hava nashin hua bal-o-par banate hue
Leave a Reply