Nasir Zaidi
janib-e-dasht kabhi tum bhi nikal kar dekho
dosto abla-pa.i ka amal kar dekho
meri ashufta-sari par na hanso ai logo
ishq ki aag men ḳhud bhi zara jal kar dekho
tum jo chaho to mire dil ko sukun mil jaa.e
apna andaz-e-nazar kuchh to badal kar dekho
main tumhen jiine ke andaz sikha sakta huun
ek do gaam mere saath to chal kar dekho
chandni-raton men phirta hai koi avara
tum ko fursat jo mile ghar se nikal kar dekho
fasle barson ke pal-bhar men simaT a.enge
aaj ki shab mire pahlu men machal kar dekho
us ka chehra hai kisi dasht ka suraj ‘nasir’
us ki janib kabhi dekho to sambhal kar dekho
Leave a Reply