baharon ko chaman yaad aa gaya hai
mujhe vo gul-badan yaad aa gaya hai
lachakti shaḳh ne jab sar uThaya
kisi ka bankpan yaad aa gaya hai
miri ḳhamoshiyon par hansne vaalo
mujhe vo kam-suḳhan yaad aa gaya hai
tumhen mil kar to ai yazdan-parasto
ghurur-e-ahraman yaad aa gaya hai
tiri surat ko jab dekha hai main ne
uruj-e-fikr-o-fan yaad aa gaya hai
kisi ka ḳhub-surat sher sun kar
tira lutf-e-suḳhan yaad aa gaya hai
mile vo ajnabi ban kar to ‘rif.at’
zamane ka chalan yaad aa gaya hai
Leave a Reply