Ahmad Ata
ik ashk baha hoga
ik sher hua hoga
chup-chap pade hain ham
dil raakh hua hoga
ik khvab sahara tha
vo tuut gaya hoga
dil ne to un ankhon par
ilzam dhara hoga
hai ishq to hai ham-kesh
dil men koi tha hoga
kya nuur tha paani men
ankhon se baha hoga
phir yaar nahin aae
phir jaam dhara hoga
ik shoala fuzun ho kar
jalta bhi raha hoga
shab khvab men aaya vo
kya kya na hua hoga
tasir kahan sach men
kuchh jhuut kaha hoga
is dil ke kharabe men
ik shahr basa hoga
mutthi men hai dil kaise
raste men mila hoga
kahne ki nahin baten
baton se bhi kya hoga
ik khvab-e-tamanna ne
barbad kiya hoga
vo sokhta-sar tha kaun
hoga to ‘ata’ hoga
Leave a Reply