ped par jaane kis ka dhyan pada
ek patthar kahin se aan pada
ek hijrat to mujh ko thi darpesh
hijr bhi us ke darmiyan pada
ye shab-e-tar-tar meri rida
ye sitaron ka saeban pada
ek palde men rakh diya tujh ko
dusre men tha ik jahan pada
kaisi thokar lagi ye sapne men
aankh par kis ka ye nishan pada
ek mutthi men phir zamin simti
ek aansu men asman pada
zindagi yaad aa gai mujh ko
phir tiri samt mera dhyan pada
tu ne nam-o-nishan diya mujh ko
mera hona tha be-nishan pada
girte rahte hain is men sham-o-sahar
bharta rahta hai khak-dan pada
ye hai kashti vajud ki ‘janan’
ye phata dil ka badban pada