kya hua kyuun hua kis liye kya ḳhabar jo hua so hua tu use bhuul ja
jaag kar raat bhar ho ga.i hai sahar ab na ḳhud ko jala tu use bhuul ja
kaun aaya yahan chal paḌin andhiyan kaun viran kar ke gaya gulsitan
kis ne rakh diin lab-e-gul pe chingariyan ye kise hai pata tu use bhuul ja
raat ki baat thi phir sahar ho ga.i vaqt chalta raha dopahar ho ga.i
shaam aane ko hai raat chhane ko hai bikhre sapne uTha tu use bhuul ja
ham-nava ham-safar mo’atabar rahbar phir milenge tujhe tu shurua kar safar
kho gaya jo guhar aa.ega lauT kar apni hasti bana tu use bhuul ja
sochna hai tira vo na tum ko mila sach to ye hai magar tu na us ko mila
us ki qismat men shayad thi tishna-labi ho gaya jo ḳhafa tu use bhuul ja
ye tira ḳhvab hai kitna nayab hai tere ruḳh par usi ki chaḌhi taab hai
ek ḳhurshed hai ek mahtab hai maan mera kaha tu use bhuul ja
dil men jo dard hai raah ki gard hai jhaaḌ de jo use vo baḌa mard hai
dekh le zindagi garm hai sard hai chhoḌ shikva-gila tu use bhuul ja
ghar se bahar nikal karvaTen mat badal chal mire saath chal ansuon men na Dhal
dekh le shaḳh par ek bhiga kanval muskurane laga tu use bhuul ja
Leave a Reply