Jab Hua Irfan To Gham Aaram-E-Jaan Banta Gaya

jab hua irfan to gham aram-e-jan banta gaya

soz-e-janan dil men soz-e-digaran banta gaya

rafta rafta munqalib hoti gai rasm-e-chaman

dhire dhire naghma-e-dil bhi fughan banta gaya

main akela hi chala tha janib-e-manzil magar

log saath aate gae aur karvan banta gaya

main to jab janun ki bhar de saghar-e-har-ḳhas-o-am

yuun to jo aaya vahi pir-e-mughan banta gaya

jis taraf bhi chal pade ham abla-payan-e-shauq

ḳhaar se gul aur gul se gulsitan banta gaya

sharh-e-gham to muḳhtasar hoti gai us ke huzur

lafz jo munh se na nikla dastan banta gaya

dahr men ‘majruh’ koi javedan mazmun kahan

main jise chhuta gaya vo javedan banta gaya

Leave a Comment