badal chuki hai har ik yaad apni surat bhi
vo ahd-e-rafta ka har khvab har haqiqat bhi
kuchh un ke kaam nikalte hain dushmani men miri
main dushmanon ki hamesha se huun zarurat bhi
kisi bhi lafz ne thama nahin hai haath mira
main padh ke dekh chuki akhiri ibarat bhi
ye jis ne rok liya mujh ko aage badhne se
vo meri be-gharazi thi miri zarurat bhi
miri shikasta-dili hi ba-ru-e-kar aai
vagarna vaqt to karta nahin riayat bhi
main apni baat kisi se bhi kar na paungi
mujhe tabah karegi ye meri aadat bhi
main kaise baat bhala dil ki maan luun ‘shabnam’
ki us ko mujh se mohabbat bhi thi adavat bhi
ye mera ijz ki dil men use utarne diya
ye us ka maan ki mangi nahin ijazat bhi