Abbas Tabish
mujhe rasta nahin milta
main jauhad men khile phulon ke haq men bol kar
daldal ki tah men dhans gaya huun
men nahin kahta ki ye kis asman ka kaun sa sayyara-e-bad hai
magar ye tah zamin ki akhiri chhat hai
yahan din hi nikalta hai na sham-e-umr dhalti hai
parinda bhi nahin koi ki jis ke paanv se koi
navishta bandh kar bhejun to samjhun us se milne ka
bahana haath aaya hai
sitara bhi nahin koi ki jis se guftugu thahre
navah-e-jism men phaili khizar-asar tanhai miri sansen badhati hai
mujhe is daldali goshe se jaane ka koi rasta nahin milta
san ai meri khizar-asar tanhai
miri khatir bhi thoda sa taraddud kar
mujhe bhi to ‘sikandar’ ke janaze men pahunchna hai
mujhe bhi ab-e-haivan se chhalakti maut ka nauha sunana hai
mujhe bhi duur jaana hai
san ai meri khizar-asar tanhai
mujhe is tukhm-e-imkan ke dariche se nikalne de
numu ki chaal chalne de
mujhe rasta nahin milta
Leave a Reply