gum-gashta manzilon ka mujhe phir nishan de
meri zamin mujh ko mira asman de
zaḳhmon ki aabru ko na yuun ḳhaak men mila
chadar mire lahu ki mire sar pe taan de
ye dhaḌkanon ka shor qayamat se kam nahin
ai rabb-e-saut mujh ko dil-e-be-zaban de
ya mujh se chhin le ye mazaq-e-buland-o-past
ya mere bal-o-par ko khula asman de
manga tha main ne kab ye jhuki gardanon ka gham
razzaq-e-gham mujhe gham-e-gardun-nishan de
sail-e-sukut ab to rag-e-jan tak aa gaya
izn-e-bayan de mujhe izn-e-bayan de
daman kushada phir se hai ḳhatun-e-gham ‘rashid’
taaza lahu se likh ke na.i dastan de
Leave a Reply