bolti ankhen dekhin jagte lab dekhen
jo surat ham ne dekhi hai sab dekhen
jaane faza men kab chalti hai mauj-e-hava
badal haT kar chand dikha.e kab dekhen
ankhen band karen to kya kya jalve hain
har su ghor andhere lapken jab dekhen
chanda chamke kaliyan chaTkin phuul khilen
jis din us ko dekhen ḳhvab ajab dekhen
jism ik rahguzar hai dil miTTi ka diya
gul hota hai kab ye charagh-e-shab dekhen
shayad nur-e-sahar phaila ho ab har su
‘arif’ dil par patthar rakh kar ab dekhen
Leave a Reply