Poet
ham to maujud the raton men ujalon ki tarah
log nikle hi nahin DhunDne valon ki tarah
jaane kyuun vaqt bhi ankhen bhi qalam bhi lab bhi
aaj ḳhamosh hain guzre hue salon ki tarah
hajaten ziist ko ghere men liye rakhti hain
ḳhasta divar se chimTe hue jalon ki tarah
raat bhigi to sisakti hui ḳhamoshi se
asman phuuT paḌa jism ke chhalon ki tarah
saari rahen sabhi sochen sabhi baten sabhi ḳhvab
kyuun hain tariḳh ke be-rabt havalon ki tarah
zindagi ḳhushk hai viran hai afsurda hai
ek mazdur ke bikhre hue balon ki tarah
zaḳhm pahne hue ma.asum bhikari bachche
safha-e-dahr pe bikhre hain savalon ki tarah
Leave a Reply