Bikharte TuTte Lamhon Ko Apna Ham-Safar Jaana

Makhmoor Saeedi

bikharte TuTte lamhon ko apna ham-safar jaana

ki tha is raah men aḳhir hamen ḳhud bhi bikhar jaana

sar-e-dosh-e-hava ik abr-pare ki tarah ham hain

kisi jhonke se puchhenge ki hai ham ko kidhar jaana

dil-e-avara kya paband-e-zanjir-e-ta.alluq ho

na tha bas men kisi ke bhi hava ko qaid kar jaana

pas-e-zulmat koi suraj hamara muntazir hoga

isi ik vahm ko ham ne chiragh-e-rah-guzar jaana

hamen to saath dena hai rafiqan-e-talatum ka

mubarak tujh ko tanha is nadi ke paar utar jaana

mire jalte hue ghar ki nishani bas yahi hogi

jahan is shahr men kuchh raushni dekho Thahar jaana

suhane mausamon ki yaad sikhlaya tujhe kis ne

ufuq par diida o dil ke dhanak ban kar bikhar jaana

hisar-e-zabt men rah kar ma.al-e-hasrat-e-dil kya

kisi qaidi parinde ki tarah ghuT ghuT ke mar jaana

dayar-e-ḳhamushi se koi rah rah kar bulata hai

hamen ‘maḳhmur’ ik din hai usi avaz par jaana