afroz-alam

Phaile Hue Ghubar Ka Phir Moajiza Bhi Dekh

phaile hue ghubar ka phir moajiza bhi dekh

raste se jo bhatak gaya vo qafila bhi dekh

main ne to asman ko thokar pe rakh liya

zarre men kaenat ka ye zaviya bhi dekh

kab tak tu saare shahr ko bauna bataega

khud par bhi kar nigah kabhi aina bhi dekh

mere labon pe dekh na tu khamushi ki mohr

tu apni harkaton ka zara silsila bhi dekh

shahr-e-ana men aaine ke ru-ba-ru huun main

ehsas ki nazar se mira hausla bhi dekh

‘alam’ nae jahan ki satvat bayan kar

sadiyon se jis pe nuur hai vo rasta bhi dekh

More Poems

Leave a Comment