Faza Ka Habs Chirti Hui Hawa uThe

fazā kā habs chīrtī huī havā uThe

safar meñ dhuup hai bahut koī ghaTā uThe

phirā.e jism par mire vo uñgliyāñ aise

ki sāz-e-rūh merā aaj jhanjhanā uThe

jo aur kuchh nahīñ to jugnuoñ ko kar raqsāñ

siyāh shab zarā zarā sī jagmagā uThe

mirī tarah tamām log be-zabāñ to nahīñ

kisī taraf kisī jagah se mas.ala uThe

mirā futūr ḳhud sadā.eñ de mujhe manzil

qadam ko chūmne mire ye rāsta uThe

na jaane sohbatoñ meñ is kī kaisā hai nasha

ki dar se har ik shaḳhs jhūmtā uThe

karo to zindagī meñ aisā kuchh karo ‘saurabh’

mirī nazar meñ terā yaar martaba uThe

Leave a Comment