faza ka habs chirti hui hava uThe
safar men dhuup hai bahut koi ghaTa uThe
phira.e jism par mire vo ungliyan aise
ki saz-e-ruh mera aaj jhanjhana uThe
jo aur kuchh nahin to jugnuon ko kar raqsan
siyah shab zara zara si jagmaga uThe
miri tarah tamam log be-zaban to nahin
kisi taraf kisi jagah se mas.ala uThe
mira futur ḳhud sada.en de mujhe manzil
qadam ko chumne mire ye rasta uThe
na jaane sohbaton men is ki kaisa hai nasha
ki dar se har ik shaḳhs jhumta uThe
karo to zindagi men aisa kuchh karo ‘saurabh’
miri nazar men tera yaar martaba uThe
Leave a Reply