chhanta hai ḳhaak kya tu ghar banane ke liye
fikr rahne ki na kar aaya hai jaane ke liye
aur ko kya ranj duun rahat uThane ke liye
ek tinke ko na chheḌun ashiyane ke liye
barq thi betab mere ashiyane ke liye
abr se bhi peshtar aa.e jalane ke liye
kaam aa.i murgh-e-gulshan ke miri kahidgi
le gaya tinka samajh kar ashiyane ke liye
is chaman se gul chale bulbul gareban phaaḌ kar
hai junun tinke jo chunne ashiyane ke liye
ham ne kyuun mangi thi gulshan men dua-e-josh-e-gul
ab jagah milti nahin hai ashiyane ke liye
phir vahi ham the vahi tum the mohabbat thi vahi
sulh kar lete agar ankhen laḌane ke liye
huun vo gham-dida hanse koi to main rone lagun
kuchh bahana chahiye aansu bahane ke liye
saaya paḌ jaa.e agar zulf-e-daraz-e-yar ka
phir kahun main bhi tasalsul hai zamane ke liye
huun vo divana ki ban kar ho vo majnun ki shabih
meri miTTi len agar laila banane ke liye
pahunchi hai shane talak kya yaar ki zulf-e-rasa
dard kyuun paida hua hai mere shane ke liye
jumla-tan hai chashm-e-nargis yaar teri diid ko
gul hama-tan-gosh hain tere fasane ke liye
yuun miri qismat men tha parvaz karna ya nasib
nochte hain tifl par mere uḌane ke liye
kaun hoga tere tiron ka nishana mere ba.ad
ḳhaak le jaana miri tuuda banane ke liye
bazm-e-alam men khaḌa huun par chala jaata huun main
siikh li hai sham.a se raftar jaane ke liye
kyuun dil-e-betab ko dikhlaya ḳhal-e-zer-e-zulf
daam men machhli nahin aane ki daane ke liye
ho agar sar-gashtagi men fikr-e-ta.amir-e-makan
ḳhaak uḌa laa.e bagula ghar banane ke liye
ab kisi gul-ru ke dil men kijiye ghar ai ‘vazir’
kya chaman men tinke chuniye ashiyane ke liye
Leave a Reply