raha asiir ka.i saal naqsh-e-pa ki tarah
ḳhuda ka shukr ab azad huun hava ki tarah
mire habib mujhe izn-e-baryabi de
khaḌa huun dar pe tire ah-e-na-rasa ki tarah
gunahgar huun ik main hi shahr men shayad
ki baat karte hain sab mujh se parsa ki tarah
abhi mila nahin mujh ko suragh manzil ka
bhaTak raha huun abhi apne rahnuma ki tarah
kise ḳhabar ki ye jiddat hai ya siyasat hai
jafa kare bhi to karta hai vo vafa ki tarah
munafiqat ka naya hai ye dil-fareb andaz
mujhe mila mira dushman bhi ashna ki tarah
mire zamir ka ye hukm hai mujhe ‘rif.at’
rakhi hai main ne jo is daur men vafa ki tarah
Leave a Reply