Aane Mein Jhijhak Milne Mein Haya Tum Aur Kahin Hum Aur Kahin

Arzoo Lakhnavi

aane men jhijhak milne men haya tum aur kahin ham aur kahin

ab ahd-e-vafa TuuTa ki raha tum aur kahin ham aur kahin

be-ap ḳhushi se ek idhar kuchh khoya hua sa ek udhar

zahir men baham batin men juda tum aur kahin ham aur kahin

aa.e to ḳhushamad se aa.e baiThe to muravvat se baiThe

milna hi ye kya jab dil na mila tum aur kahin ham aur kahin

va.ada bhi kiya to ki na vafa aata hai tumhen charkon men maza

chhoḌo bhi ye zid lutf is men hai kya tum aur kahin ham aur kahin

bargashta-nasib ka yuun hona sona bhi to ik karvaT sona

kab tak ye juda.i ka rona tum aur kahin ham aur kahin

dil milne pe bhi pahlu na mila dushman to baghal hi men hai chhupa

qatil hai mohabbat ki ye haya tum aur kahin ham aur kahin

yaksui-e-dil marghub hamen barbadi-e-dil matlub tumhen

is zid ka hai aur anjam hi kya tum aur kahin ham aur kahin

dil se hai agar qaa.em rishta to dur-o-qarib ki bahs hi kya

hai ye bhi nigahon ka dhoka tum aur kahin ham aur kahin

sun rakkho qabl-e-ahd-e-vafa qaul arzu-e-shaida.i ka

jannat bhi hai dozaḳh gar ye hua tum aur kahin ham aur kahin