Har Lamha Agar Gurez-Pa Hai

har lamha agar gurez-pa hai

tu kyuun mire dil men bas gaya hai

chilman men gulab sambhal raha hai

ye tu hai ki shokhi-e-saba hai

jhukti nazren bata rahi hain

mere liye tu bhi sochta hai

main tere kahe se chup huun lekin

chup bhi tu bayan-e-muddaa hai

har des ki apni apni boli

sahra ka sukut bhi sada hai

ik umr ke baad muskura kar

tu ne to mujhe rula diya hai

us vaqt ka hisab kya duun

jo tere baghair kat gaya hai

maazi ki sunaun kya kahani

lamha lamha guzar gaya hai

mat maang duaen jab mohabbat

tera mera muamla hai

ab tujh se jo rabt hai to itna

tera hi khuda mira khuda hai

rone ko ab ashk bhi nahin hain

ya ishq ko sabr aa gaya hai

ab kis ki talash men hain jhonke

main ne to diya bujha diya hai

kuchh khel nahin hai ishq karna

ye zindagi bhar ka rat-jaga hai

Leave a Comment