har ek baat na kyuun zahr si hamari lage
ki ham ko dast-e-zamana se zakhm kaari lage
udasiyan hon musalsal to dil nahin rota
kabhi kabhi ho to ye kaifiyat bhi pyari lage
ba-zahir ek hi shab hai firaq-e-yar magar
koi guzarne baithe to umr saari lage
ilaaj is dil-e-dard-ashna ka kya kiije
ki tiir ban ke jise harf-e-gham-gusari lage
hamare paas bhi baitho bas itna chahte hain
hamare saath tabiat agar tumhari lage
‘faraz’ tere junun ka khayal hai varna
ye kya zarur vo surat sabhi ko pyari lage
Leave a Reply