Sahar Ansari
tang aate bhi nahin kashmakash-e-dahr se log
kya tamasha hai ki marte bhi nahin zahr se log
shahr men aa.e the sahra ki faza se thak kar
ab kahan ja.enge aseb-zada shahr se log
naḳhl-e-hasti nazar aa.ega kabhi naḳhl-e-salib
ziist ki faal nikalenge kabhi zahr se log
ham ko jannat ki faza se bhi ziyada hai aziiz
yahi be-rang si duniya yahi be-mehr se log
mutma.in rahte hain tufan-e-masa.ib men kabhi
Duub jaate hain kabhi dard ki ik lahr se log
ai zamin aaj bhi zarre hain tire mahr-tarash
ai falak aaj bhi laḌte hain tire qahr se log
sirf mahrumi-e-farhad ka kya zikr ‘sahar’
be-sutun kaaT ke mahrum rahe nahr se log
Leave a Reply