Noor Bijnauri
aql ne laakh andheron men chhupaya hai tujhe
mera vijdan magar chuum ke aaya hai tujhe
vo tilismat nazar aa.e ki dekhe na sune
jab bhi ankhon ke charaghon men jalaya hai tujhe
raat bhigi hai to chheḌa hai tire dard ka saaz
chand nikla hai to chupke se jagaya hai tujhe
main to kya vaqt bhi ab chhu na sakega tujh ko
ishq ne masnad-e-yazdan pe biThaya hai tujhe
vo tira husn ki ḳhira thi zamane ki nazar
ye mira fan ki tira aks dikhaya hai tujhe
aaj bhi zehan men bijli si chamak uThti hai
kaun bhola hai tujhe kis ne bhulaya hai tujhe
jagmagati hai miri ruuh to main sochta huun
main ne khoya hai miri jaan ki paaya hai tujhe
Leave a Reply