vahi musafir musafirat ka mujhe qarina sikha raha tha
jo apni chhagal se apne ghoḌe ko aap paani pila raha tha
dukhon ke gaare men haath lithḌe hue the mere hunar ke lekin
main rote rote bhi muskurata hua koi but bana raha tha
kuchh is liye bhi miri sada par har ik sama.at ko tha bharosa
guman ke sahra men baiTh kar main yaqin ke giit ga raha tha
suna hai kal raat mar gaya vo barahna darvesh jhonpaḌi men
fana ke bistar pe jo baqa ki haris gudḌi bichha raha tha
miri nazar men vo tifl masjid ke peshva se bhi mohtaram hai
jo ehtiraman gali se gandum ke bikhre daane uTha raha tha
bahut muqaddas the us sipahi ki donon ankhon ke surḳh Dore
jo soi maḳhluq ki hifazat men ḳhvab apne ganva raha tha
tamam shab us ke bhuke bachchon ne jaag kar hi guzar di thi
ḳhudi ke fōtpath par jo ghurbat thapak thapak kar sula raha tha
vo meri barsi pe meri mayyat ke naam sham-e-ghazal thi ‘vasif’
main apni turbat men leTe leTe kalam sab ko suna raha tha
Leave a Reply