Fazl Tabish
milon ke shahr men ghaTta hua din sochta hoga
dhuen ko jitne valon ka suraj dusra hoga
agar mar kar phir uThna hai to marne ki ḳhushi kya hai
badan khone ka gham jiine ki ḳhushiyon se siva hoga
suna hai ye zamin uḌti phiregi ruui ki surat
tamasha karne vaala hi tamasha dekhta hoga
main chiḌiyon ko ulajhte dekh kar laḌta samajhta huun
magar sachcha.i kya hai ye unhin se puchhna hoga
tumhara jism meri aag men tap kar nikharta hai
magar ik roz mera jism ThanDa paḌ gaya hoga
mujhe ḳhushbu lapeTe jism kuchh achchhe nahin lagte
magar us ko mira ḳhali badan bhi kaTta hoga
Leave a Reply