faujiyon ke sar to dushman ke sipahi le gae
haath jo qimat lagi zill-e-ilahi le gae
jurm mera sirf itna tha ki main mujrim na tha
qaid tak mujh ko subut-e-be-gunahi le gae
ab vahi duniya men Thahre amn-e-alam ke amiin
jo amaan ki ja tak asbab-e-tabahi le gae
shikva-e-jalva-numai sirf un ke lab pe hai
jo tiri mahfil men apni kam-nigahi le gae
tum haram se le gae shab ki siyahi aur ham
mai-kade se bhi ziya-e-sub.h-gahi le gae
main idhar ‘aḳhlaq’ ki taqsim men masruf tha
log udhar meri ada-e-kaj-kulahi le gae
Leave a Reply