Itni Arzan Mai-E-Gulfam Na Thi

itnī arzāñ mai-e-gulfām na thī

jab vo maḳhmūr nazar aam na thī

tujh se vābasta hai merī qismat

ye ḳhabar gardish-e-ayyām na thī

yaad aate haiñ vo lamhāt ki jab

zindagī sho.ala-bar-andām na thī

thī jahāñ manzil-e-irfān-o-yaqīñ

duur tak sarhad-e-auhām na thī

kyā huā sham.a ko ye pichhle pahar

muzmahil itnī sar-e-shām na thī

haañ batā chashm-e-haqīqat-āgāh

zindagī kyā thī gar in.aam na thī

Leave a Comment