ruuh hazir hai mire yaar koi masti ho
halqa-e-raqs hai tayyar koi masti ho
mujh ko miTTi ke piyale men pila taaza sharab
jism hone laga be-kar koi masti ho
chaar samton ne tire hijr ke ghunghru bandhe
aur ham log bhi hain chaar koi masti ho
main man-o-tu ke sahifon ki tilavat karunga
be-vazu huun miri sarkar koi masti ho
koi vaa.iz na vazifa ki koi saum-o-salat
jaan chhuTe miri ik baar koi masti ho
tere ehsas ki shiddat se bhara baiTha huun
ab na inkar na iqrar koi masti ho
be-niyazana rahega tiri duniya men faqir
ḳhvab-o-ḳhvahish nahin darkar koi masti ho
Leave a Reply