Ab ghaTaen Chahiyen Saqi Na Paimana Mujhe

ab ghaTā.eñ chāhiyeñ saaqī na paimāna mujhe

us ke ġham ne kar diyā har ġham se begāna mujhe

ḳhatm kar denā hai ab vahshat kā afsāna mujhe

kah ga.e apnī zabāñ se vo bhī dīvāna mujhe

nahnu-aqrab kī sadā detī hai ḳhud manzil mirī

ab na ka.aba raah meñ roke na but-ḳhāna mujhe

dil meñ jab sham-e-haqīqat sho.ala-rū ho jā.egī

ḳhud jalā degī samajh kar apnā parvāna mujhe

kyā ġham-e-daurāñ kī bāteñ kyā sulūk-e-dostāñ

kyoñ sunātī hai ye duniyā merā afsāna mujhe

apnī kuTiyā kī rihā.ish par hai faḳhr-o-imbisāt

kyā lubhā.egā kisī kā qasr-e-shāhāna mujhe

is tarah ḳhush huuñ ki jaise ‘shauq’ sab kuchh de diyā

baḳhsh kar allāh ne ik dil faqīrāna mujhe

Leave a Comment