aati hai zindagi men ḳhizan bhi bahar bhi
sehn-e-chaman men phuul bhi hote hain ḳhaar bhi
narazgi na ho to mohabbat hai be-maza
hasti ḳhushi bhi gham bhi hai nafrat bhi pyaar bhi
be-e’tina.iyon men bhi hai chashni ka lutf
hota hai iltifat kabhi nagavar bhi
chhoḌa na ḳhauf-e-hijr ne daman tamam raat
aghosh-e-pur-sukun men tha dil be-qarar bhi
arman ka ḳhuun samaj ki talvar ne kiya
majbur maslahat se hua iḳhtiyar bhi
mehnat ki saḳht dhuup men pipal ki chhanv men
hai dasht-e-gham men abr-e-karam ki phuvar bhi
har-chand be-daregh baha ḳhun-e-arzu
lekin hua hai daman-e-dil lala-zar bhi
ganjina-e-sifat hai us ki har ek baat
surat bhi guftugu bhi ada bhi shi.ar bhi
angur ke ye baagh lab-e-ju ye chahchahe
hoga yahin kahin pe hamara mazar bhi
‘jami’ pe kya banegi ḳhuda jaane hashr men
jannat ki aarzu hai gunahon se pyaar bhi
Leave a Reply