Syed Kashif Raza
bahut se dard the par ḳhud ko joḌ kar rakkha
vo main ki atish o aahan men jis ne sar rakkha
main vo huun jis ne ta.aqub men apne maut rakhi
aur apne sar ko sada us ki maar par rakkha
nashat o fat.h miri dastaras men the lekin
kitab-e-umr men dukh-dard besh-tar rakkha
mile hue the mujhe chahaton ke dar kitne
magar main vo ki havaon pe mustaqar rakkha
bahut se log mire vaste the dast-kusha
magar nazar men tira hi dayar-o-dar rakkha
kabhi hui hi nahin mujh ko be-ghari mahsus
ḳhud apne paanv pe jab se hai apna ghar rakkha
gavah hain mire misron ke bast-o-dar ‘kashif’
chuna jo harf use kar ke barvar rakkha
Leave a Reply