aah bhi ik koshish-e-nakam hai mere liye
aisi sahba-e-kuhan aur ḳhaam hai mere liye
zindagi ik shorish-e-alam hai mere liye
jo nafas hai gardish-e-ayyam hai mere liye
sha.eri hi vaj.h-e-nang-o-nam hai mere liye
aur jo kuchh hai vo sab ilzam hai mere liye
meri arz-e-shauq be-ma.ani hai un ke vaste
un ki ḳhamoshi bhi ik paigham hai mere liye
ye miri ashufta-e-hali ye miri avargi
jaise saari gardish-e-ayyam hai mere liye
kis qadar ma.asum kaisi garm kitni dil-navaz
vo nigah-e-naz jo bad-nam hai mere liye
aaj kya hone ko hai ai gardish-e-haft-asman
har sitara larza-bar-andam hai mere liye
Leave a Reply