tujh men kab husn-e-bahar-e-gul ki ra.ana.i na thi
kab tire jalvon ki ik duniya tamasha.i na thi
zindagi-bhar aarzu ka ḳhuun hi hota raha
lab pe lekin ek din bhi aah tak aa.i na thi
ye ghalat hai mera sajda vaj.h-e-rusva.i hua
rashk-e-mehrab-e-haram kab teri angḌa.i na thi
ishq hai ik atish-e-dil-soz men jalne ka naam
ham ko to roz-e-azal ye baat samjha.i na thi
ham rahe hain manzilon hi manzilon men umr-bhar
jaise qismat men kisi pahlu shakeba.i na thi
ik chaman kya do-jahan ki afaton se duur tha
ghuncha-e-nauras ke lab tak jab hansi aa.i na thi
kya kahun ‘jauhar’ jo mere jan-o-dil par ban ga.i
maut ka paigham tha ik sham-e-tanha.i na thi
Leave a Reply