Inaam Azmi
jis taraf dekhiye bazar udasi ka hai
shahr men kaun ḳharidar udasi ka hai
ab to ankhon men bhi aansu nahin aate mere
ye alag ruup mire yaar udasi ka hai
ruuh bechari pareshan hai kahan jaa.e ab
is qadar jism pe ab baar udasi ka hai
apne hone ka guman tak nahin hota mujh ko
jaane ye kaun sa me.aar udasi ka hai
ab ye ehsas hamesha mujhe hota hai dost
mujh men ik shaḳhs talabgar udasi ka hai
aa.ina dekh ke ma.alum hua hai mujh ko
zaḳhm chehre pe bhi is baar udasi ka hai
ye udasi mujhe tanha nahin rahne deti
haan tire ba.ad ye upkar udasi ka hai
Leave a Reply