Apni Aankhon Ko Kabhi Thik Se Dhoya Hi Nahin

apnī āñkhoñ ko kabhī Thiik se dhoyā hī nahīñ

sach kahūñ aaj talak khul ke maiñ royā hī nahīñ

mere lafzoñ se mirā dard jhalak jaatā hai

jabki is dard ko āvāz meñ boyā hī nahīñ

ik daf.a niiñd meñ ḳhvāboñ kā janāza dekhā

ba.ad us ke maiñ kabhī chain se soyā hī nahīñ

tañg galiyoñ meñ mohabbat kī bhaTakte haiñ sab

maiñ ne koshish to ka.ī baar kī khoyā hī nahīñ

saañs ruk jaa.e taḌapte hue yādoñ meñ kahīñ

hijr kā bojh kabhī dil pe yuuñ Dhoyā hī nahīñ

maiñ kahānī meñ nayā moḌ bhī lā saktā thā

maiñ ne kirdār ko aañsū meñ bhigoyā hī nahīñ

apne rishte kā bhī ab ‘mīt’ bikharnā tai thā

ham ne vishvās ke dhāge meñ piroyā hī nahīñ

Leave a Comment