Amit Sharma Meet
apni ankhon ko kabhi Thiik se dhoya hi nahin
sach kahun aaj talak khul ke main roya hi nahin
mere lafzon se mira dard jhalak jaata hai
jabki is dard ko avaz men boya hi nahin
ik daf.a niind men ḳhvabon ka janaza dekha
ba.ad us ke main kabhi chain se soya hi nahin
tang galiyon men mohabbat ki bhaTakte hain sab
main ne koshish to ka.i baar ki khoya hi nahin
saans ruk jaa.e taḌapte hue yadon men kahin
hijr ka bojh kabhi dil pe yuun Dhoya hi nahin
main kahani men naya moḌ bhi la sakta tha
main ne kirdar ko aansu men bhigoya hi nahin
apne rishte ka bhi ab ‘mit’ bikharna tai tha
ham ne vishvas ke dhage men piroya hi nahin
Leave a Reply