Karrar Noori
har-gam tajrabat ke pahlu badal ga.e
logon ko aazma ke ham aage nikal ga.e
ham ko to ek lamha ḳhushi ka na mil saka
kya log the jo ziist ke sanche men Dhal ga.e
kya kya taghayyurat ne duniya dikha.i hai
mahsus ye hua ki bas ab ke sambhal ga.e
ham zindagi ki jehd-e-musalsal ke vaste
maujon ki tarah sina-e-tufan men Dhal ga.e
jab bhi koi fareb diya ahl-e-dahr ne
ham ik nazar-shanas koi chaal chal ga.e
haavi hue fasane haqiqat pe is tarah
tariḳh zindagi ke havale badal ga.e
ham ne lachak na khaa.i zamane ki zarb se
go hadsat-e-dahr ki rau men kuchal ga.e
‘nuri’ kabhi jo yaas ne Toka hamen kahin
ham daman-e-hayat pakaḌ kar machal ga.e
Leave a Reply