kya kya vo hamen suna gaya hai
rah rah ke ḳhayal aa raha hai
ik baat na kah ke aaj koi
baton men hamen hara gaya hai
tum ḳhush nahin hoge ham se mil ke
aa ja.enge ham hamara kya hai
ham laakh javaz DhunDte hon
jo kaam bura hai vo bura hai
kya fa.eda fa.ede ka yaaro
nuqsan men kya muza.iqa hai
tum Thiik hi kah rahe the us din
kuchh ham ne bhi in dinon suna hai
jitni hai tiri nigah qatil
utni tire haath men shifa hai
do-shaḳha hai mere zehn men kyon
jab samne ek rasta hai
kahne ko hara-bhara hai lekin
andar se daraḳht khokhla hai
ḳhush karne ko jo kahi thi tu ne
‘basir’ usi baat par ḳhafa hai
Leave a Reply