Liyaqat Ali Aasim
ḳhvab ta.abir men Dhalte hain yahan se aage
aa nikal jaa.en shab-e-vahm-o-guman se aage
rang pairahan-e-ḳhaki ka badalne ke liye
mujh ko jaana hai abhi reg-e-ravan se aage
ik qadam aur sahi shahr-e-tanaffus se udhar
ik safar aur sahi kucha-e-jan se aage
is safar se koi lauTa nahin kis se puchhen
kaisi manzil hai jahan-e-guzaran se aage
main bahut tez havaon ki guzargah men huun
ek basti hai kahin mere makan se aage
meri avargi yuun hi to nahin hai ‘asim’
koi ḳhushbu hai miri umr-e-ravan se aage
Leave a Reply