mujh ko samjho yadgar-e-raftagan-e-lucknow
huun qadd-e-amdam ghubar-e-karvan-e-lucknow
ḳhun-e-hasrat kah raha hai dastan-e-lucknow
rah gaya hai ab yahi rangin-bayan-e-lucknow
gosh-e-ibrat se sune koi miri fariyad hai
bulbul-e-ḳhunin nava-e-bostan-e-lucknow
mere har aansu men ik a.ina-e-tasvir hai
mere har naale men hai tarz-e-fughan-e-lucknow
DhunDhta hai ab kise le kar charagh-e-aftab
kyuun miTaya ai falak tu ne nishan-e-lucknow
lucknow jin se ibarat thi hue vo napadid
hai nishan-e-lucknow baaqi na shan-e-lucknow
ab nazar aata nahin vo majma.a-e-ahl-e-kamal
kha ga.e un ko zamin-o-asman-e-lucknow
pahle tha ahl-e-zaban ka daur ab gardish men hain
chahiye thi tegh-e-urdu ko fasan-e-lucknow
marsiya-go kitne yakta-e-zamana the yahan
koi to itnon men hota nauha-ḳhvan-e-lucknow
ye ghubar-e-na-tavan ḳhakistar-e-parvana hai
ḳhandan apna tha sham-e-dudman-e-lucknow
chalta tha jab ghuTniyon apne yahan tifl-e-razi.a
sajda karte the use gardan-kushan-e-lucknow
ahd-e-pirana-sari men kyuun na shirin ho suḳhan
bachpane men main ne chusi hai zaban-e-lucknow
gulshan-e-firdaus par kya naaz hai rizvan tujhe
puchh us ke dil se jo hai rutba-dan-e-lucknow
bu-e-uns aati hai ‘haidar’ ḳhak-e-maTiya-burj se
jam.a hain ik ja vatan-avargan-e-lucknow
Leave a Reply