bhiiḌ hai logon ki har su ashna koi nahin
main kise avaz duun pahchanta koi nahin
an-ginat patte gire peḌon se ashkon ki tarah
ab ki rut men hadson ki intiha koi nahin
mere dil men chand raushan meri palkon par nujum
main zamin par asman huun janta koi nahin
aap ke naqsh-e-qadam bhi ab nahin manzil-numa
lauT jaane ka bhi ab to rasta koi nahin
dushmanon ko bhi jo dars-e-dosti deta rahe
is sitamgar daur men itna baḌa koi nahin
kis qadar beganagi hai shahr-e-be-ehsas men
aadmi se aadmi ka rabta koi nahin
be-talab kis ke gale men Daal duun is haar ko
mujh se meri zindagi bhi mangta koi nahin
kya vazahat main karun kya log honge mutma.in
tujh ko meri aankh se to dekhta koi nahin
raat ke pichhle pahar ‘nusrat’ kise avaz duun
so raha hai shahr saara jagta koi nahin
Leave a Reply